ihr wißt’s jo gor nit liabe gäst,

wos i jetzt hob ausglöst.

schreib so dahin anonym, frank und frei

und signier holt nur mit trau di lei.

 

do kriag i an onruf von da zeitung da klan

ob i ebba beim norrnlog gschriebn han.

hob i glei gestondn, dos i des bin

tjo und jetz is mei anonymität dahin.

 

geoutet sozusogn im netz

mocht oba nix, weil bei der hetz

moch i mit is jo gonz klor,

bin jo nit umsunst a foschingsnorr.

 

zerst hob i gedocht, wia de mi ongruafn hom

ob i gach mei zeitung nit gezohlt hon,

oba donn wie i mit da dame hob gred -

übrigens de wor klass und sehr nett, -

is mei mißtraun glei weg gwesn

hob jo an dauerauftrog – konn nit vagessn.

 

so fratschelt de mi aus, amüsiert

und i hob kurz über mei leben refariert,

und sie gesteht es wor echt a plog,

bis se mi endlich gfundn hot.

2 tog long hot se gsuacht

und was nit wos vasuacht.

 

obwohl, und do heb i mahnend die hond,

da stöflin helmuth hätt mi eh gekonnt

is von da gründung on, a minster do gwesn

und von onfong on auf da lurnibonk gsessn.

 

so segts, nix is so fein gesponnen,

dos es nit doch kimmt on’d sonnen.

mit da geheimnistuarei is endlich vorbei

i bin a lurni also trauts euch lei ;-)